བོད་ནུབ་ཕྱོགས་སུ་སྐུ་འཁྲུངས་ཤིང་།དགུང་ལོ་བཞིར་ལོན་པ་ཕྱི་ལོ་༡༩༥༩ལོར་བོད་དུ་རྒྱ་ནག་གི་བཙན་འཛུལ་བྱས་པས་ཁོང་བཙན་བྱོལ་དུ་ཕེབས་ཏེ་རྒྱ་གར་ལྷོ་ཕྱོགས་སུ་བཞུགས།རིམ་གྱིས་སློབ་གྲྭར་ཞུགས་ཏེ་སྔོན་འགྲོའི་སློབ་སྦྱོང་ཆ་ཚང་གནང་།དེ་ནས་ཝ་ཎ་མཐོ་སློབ་ཏུ་ཞུགས་ཏེ་རྒྱ་བོད་དབྱིན་གསུམ་སོགས་ལ་སྦྱངས་པ་མཛད།ཕྱི་ལོ་༡༩༧༢ལོར་ས་སྐྱ་མཐོ་སློབ་དབུ་བརྙེས་པ་ན་དམ་པ་འདི་ཡང་མཐོ་སློབ་ཏུ་འཛུལ་ཞུགས་གནང་སྟེ་མཁན་ཆེན་དམ་པ་ཨ་པད་རིན་པོ་ཆེ་མཆོག་གི་སྐུ་མདུན་ནས་མདོ་སྔགས་ཀྱི་གཞུང་ལུགས་བསམ་གྱི་མི་ཁྱབ་པར་གསན་བསམ་མཛད་པས་མཁན་སློབ་ཀུན་གྱིས་ཁོང་ནི་སློབ་མ་རྣམས་ལས་རིག་པ་དང་ཀུན་སྤྱོད་སོགས་རྩེ་ཕུད་ཀྱི་གྲས་སུ་ངོས་འཛིན་དང་བསྔགས་བརྗོད་ཡང་ཡང་གནང་།དམ་པ་ཁོང་ནི་འདི་གའི་སློབ་གཉེར་བ་ཐོག་མའི་གྲས་སུའང་ཡིན།སྔར་ཕྱིར་༧སྐྱབས་མགོན༧གོང་མ་རིན་པོ་ཆེ་མཆོག་དང་།བཅོ་བརྒྱད་ཁྲི་ཆེན་རིན་པོ་ཆེ།།ངོར་ཀླུ་ལྡིང་མཁན་ཆེན་རྡོ་རྗེ་འཆང་སོགས་ཀྱི་སྐུ་མདུན་ནས་དབང་ལུང་མན་ངག་དང་བཅས་མཐའ་ཡས་པ་གསན།
ཁོང་གིས་ཤར་ནུབ་ཀྱི་ཡུལ་གྲུ་མང་པོར་དབྱིན་སྐད་ཀྱི་ཐོག་ནས་ཐད་ཀར་ཆོས་བཤད་དང་སློབ་སྟོན་སོགས་ཤིན་ཏུ་ཚིག་བཟུང་སླ་བ་དང་།དོན་གོ་བདེ་བ།བློ་ངོར་འཇགས་བདེ་བ་སོགས་གནང་བས་ཀུན་ཀྱིས་བསྔགས་བརྗོད་ཡང་ཡང་གནང་།སྐབས་དེ་དུས་བོད་ཀྱི་སྤྱི་ཚོགས་ནང་དབྱིན་སྐད་ཀྱི་ཐོག་ནས་ཐད་ཀར་ཆོས་བཤད་དང་དཔེ་ཁྲིད་གནང་ཐུབ་མཁན་ཤིན་ཏུ་དཀོན་པའི་སྐབས་ཡིན།
རྡ་ས་བོད་ཀྱི་དཔེ་མཛོད་ཁང་ནང་སྐད་བསྒྱུར་གྱི་ཕྱག་ལས་དང་ཝ་ཎ་མཐོ་སློབ་ཏུ་དཔེ་ཁྲིད་དགེ་རྒན་གྱི་ཐུགས་འགན་ལོ་མང་རིང་བཞེས།ཕྱི་ལོ་༡༩༨༩ལོ་ནས་བཟུང་ཕྱི་ལོ་༡༩༩༩བར་དཔལ་ས་སྐྱ་མཐོ་རིམ་སློབ་གྲྭའི་མཁན་པོ་དང་སློབ་སྤྱི་གཅིག་ལྕོགས་ཀྱི་ཐུགས་འགན་བཞེས་ཞོར་དུ་༧སྐྱབས་མགོན་གདུང་སྲས་སྐུ་བགྲེས་གཞོན་རྣམ་གཉིས་དང་ངོར་རྫོང་ཚར་གསུམ་གྱི་བླ་ཆེན་རྣམ་པས་དབུས་ས་སྐྱའི་བླ་སྤྲུལ་མང་པོའི་ཟུར་ཁྲིད་ཀྱི་སློབ་དཔོན་ཡང་གནང་།མཐར་ཕྱི་ལོ་༡༩༩༩ལོར་སྐུ་ཞི་བར་གཤེགས་སོ།