ཀུན་མཁྱེན་གོ་བོ་རབ་འབྱམས་པ་བསོད་ནམས་སེང་གེ་དམ་པ་གང་ཉིད་ནི། མདོ་ཁམས་ཆུ་བཞི་སྒང་དྲུག་གི་ཡ་གྱལ་སྨར་ཁམས་སྒང་གི་ཁོངས་གཏོགས་སྨར་ཁམས་རྫོང་གི་དཀྱིལ་ཤར་ངོས་འབོམ་ཞེས་པའི་ལུང་པ་རྒྱབ་རི་གླང་ཆེན་འཕྲེད་ལ་ཉལ་འདྲ། མདུན་རི་དར་གྱི་ཡོལ་བ་ཕྱེས་འདྲ། གཡས་རི་རྒྱལ་མཚན་བསྙིལ་འདྲ། གཡོན་རི་པད་མ་ཁ་ཕྱེས་པ་ལྟ་བུའི་ཁོར་ཡུག་གི་དབུས་སུ་འབུམ་མཚོ་ཕྱུག་མོ་ཞེས་པའི་ཉེ་འགྲམ་འབུམ་གོ་བོ་སྟེང་ཞེས་པའི་གྲོང་པ་དེར་ཕྱི་ལོ་༡༤༢༩་ལོར་སྐུ་འཁྲུངས་ཤིང་།མཚན་ལ་བསོད་ནམས་སེང་གེ་ཞེས་ཞུ། དེ་ནས་ཀུན་མཁྱེན་གོ་བོ་རབ་འབྱམས་པ་ཤེས་རབ་དཔལ་དང་། རོང་སྟོན་ཤེས་བྱ་ཀུན་རིག་བྱམས་ཆེན་རབ་འབྱམས་པ་སངས་རྒྱས་འཕེལ། མུས་ཆེན་རྗེ་བཙུན་དཀོན་མཆོག་རྒྱལ་མཚན། འཇམ་དབྱངས་ཀུན་དགའ་བཟང་པོ་ཡབ་སྲས་སོགས་མཁས་གྲུབ་གཉིས་ལྡན་གྱི་བཤེས་གཉེན་མང་པོའི་ཞབས་ལ་གཏུགས་ནས་གསུང་རབས་སྤྱི་དང་། ལྷག་པར་དུ་དཔལ་ས་སྐྱ་གོང་མ་རྣམ་ལྔའི་གསུང་རབས་མཐའ་དག་ཁོང་དུ་ཆུད་པར་མཛད།
ཕྱི་ལོ་༡༤༦༣་ལོར་འབྲས་ཡུལ་རྫོང་དཀར་སྐྱེད་ཚལ་དུ་ཀུན་མཁྱེན་སངས་རྒྱས་འཕེལ་གྱི་རྒྱལ་ཚབ་མངའ་གསོལ། དེའི་སྔ་བཞུགས་སུ་སྡོམ་པ་གསུམ་གྱི་རབ་ཏུ་དབྱེ་བའི་རྣམ་བཤད་རྒྱལ་བའི་གསུང་རབ་ཀྱི་དགོངས་པ་གསལ་བ། སོགས་གསུང་རྩོམ་དུ་མ་ལྗགས་རྩོམ་མཛད་པས་སྐུ་ན་ཕྲ་ཡང་དམ་པའི་མཚན་ཉིད་མངོན་སུམ་དུ་བསྟན་པར་མཛད །
ཕྱི་ལོ་༡༤༦༦་ལོར་༧གོང་མ་ཀུན་དགའ་བཀྲ་ཤིས་རྒྱལ་མཚན་གྱིས་སྦྱིན་བདག་མཛད་དེ་མཆོད་སྤྲིན་གྱ་ནོམ་པ་དང་བཅས་རྟ་ནག་གསེར་གླིང་དགོན་པ་ཕྱག་འདེབས་མཛད། དེར་ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་དཀའ་གནས་ལ་དཔྱད་པ་སྦས་དོན་ཟབ་མོ་གཏེར་ཀྱི་ཁ་འབྱེད། སོགས་གཞུང་ལུགས་ཀྱི་དཀའ་གནད་ཟབ་མོ་བཀྲལ་བའི་ལྗགས་རྩོམ་མང་དུ་མཛད། དེའི་ཚེ་ཇི་ལྟར་ཀུན་མཁྱེན་བསོད་ནམས་ཆེན་པོའི་གཟིམ་ལམ་ལ་ཤར་བ་ལྟར་དམ་པ་འདིས་ཆོས་ཀྱི་འཁོར་ལོ་རྒྱ་ཆེན་དུ་བསྐོར་ཞིང་། ཧེ་བཛྲའི་རྒྱུད་ཀྱི་བསྟན་སྲུང་ཆེན་པོ་མ་ཧ་ཀ་ལ་རྡོ་རྗེ་གུར་ཀྱིས་ཀྱང་གང་ཉིད་ཀྱི་ཞབས་རྡུལ་སྤྱི་བོར་བླངས་ནས་ཕྱག་བྱས་པ་དང་། གཙང་ཆེན་དོན་གྲུབ་རྡོ་རྗེ་དང་། དཔོན་དྲུང་གཡུང་ས་ཚེ་དབང་བཀྲ་ཤིས་སོགས་དད་ལྡན་འབྱོར་བ་ཅན་མང་པོ་རྗེས་སུ་བཟུང་། ཉམས་དང་རྟོག་པ་གོང་དུ་འཕེལ་ཞིང་ལྷག་པའི་ལྷའི་ཞལ་མཇལ་གསུང་གི་དབུགས་དབྱུང་དུ་མ་ཐོབ།
ཕྱི་ལོ་༡༤༧༢་ལོར་མི་དབང་རིན་སྤུངས་བ་དོན་ཡོན་རྡོ་རྗེས་སྦྱིན་བདག་ཞུས་ནས་ཚོགས་ཀྱི་འཁོར་ལོ་ཟད་མི་ཤེས་པ་དང་ལྷན་དུ་གདན་ས་རི་ཁུད་དུ་གདན་དྲངས་ཤིང་། དགོན་པའི་མཚན་ལ་ཐུབ་བསྟན་རྣམ་པར་རྒྱལ་བ་ཞེས་གསོལ། དེའི་སྐབས་སུ་མདོ་མཁར། དགའ་བ་ཚལ་སོགས་སུ་བྱོན་ནས་སྐལ་ལྡན་གྱི་སྐྱེ་བུ་དུ་མ་ཆོས་ལ་བཀོད་ཅིང་། ཚད་མ་རིག་པའི་གཏེར་གྱི་དཀའ་བའི་གནད་རྣམ་པར་བཤད་པ་སྡེ་བདུན་རབ་གསལ། སོགས་བསྟན་བཅོས་ཀྱང་མང་དུ་བརྩམས། ཕྱི་ལོ་༡༤༧༣་ལོར་གདན་ས་རིན་ཆེན་རྩེར་གནས་སྤོས་ནས་ལྷ་ཁང་ནང་རྟེན་དང་བཅས་པ་ལེགས་པར་བཞེངས་ཤིང་། བཤད་སྒྲུབ་ཀྱི་སྡེ་ཆེན་པོ་བཙུགས། བུ་སློབ་ནམ་མཁའི་སྐར་མ་ལྟར་གྲངས་ལས་འདས་པ་ཡོད་པའི་ནང་ནས་སྲས་ཀྱི་ཐུ་བོ་གནས་ལྔ་རིག་པའི་པན་ཌི་ཏ་ཆེན་པོ་དབང་ཕྱུག་གྲུབ་པ། སོག་པོ་བཀའ་བཅུ་བ། བྱམས་པ་ཐུགས་རྗེ་དཔལ་བཟང་སོགས་མང་དུ་བྱོན། ཕྱི་ལོ་༡༤༨༣་ལོར་གདན་ས་ཨེ་ཝྃ་པའི་༼གདན་རབས་གཉིས་༽གདན་རབས་བདུན་པ་རེད་འདུག་སྙམ།རྗེ་བཙུན་བླ་མ་མུས་པ་ཆེན་པོ་དཀོན་མཆོག་རྒྱལ་མཚན་དགོངས་པ་ཆོས་དབྱིངས་སུ་ཐིམ་པའི་གདན་ཚབ་ཏུ་ཇི་ལྟར་གདན་ཞུ་ནན་གྱིས་འབྱོར་བ་བཞིན་འབྱོན་དགོས་བྱུང་བས་གདན་ས་ངོར་བའི་༼ཁྲི་རབས་གསུམ་༽པར་གྱུར། བདུན་པ་ཡིན་སྙམ། དེར་བཞུགས་ཟབ་གསང་རྡོ་རྗེ་ཐེག་པའི་སྐལ་ལྡན་གྱི་སྐྱེས་བུ་མང་པོ་སྨིན་གྲོལ་གྱི་ལམ་ལ་འགོད་པར་མཛད། ཤེས་རབས་ཀྱི་ཕ་རོལ་ཏུ་ཕྱིན་པའི་མན་ངག་མངོན་རྟོགས་རྒྱན་གྱི་འགྲེལ་བ་སྦས་དོན་ཟབ་མོ་གནད་ཀྱི་སྒྲོན་མེ། སོགས་བསྟན་བཅོས་མང་པོ་བརྩམས།
ཕྱི་ལོ་༡༤༨༩་དཔོན་སློབ་བདུན་བརྒྱ་དང་བཅས་དཔལ་ས་སྐྱར་བྱོན་ནས་དགེ་འདུན་འདུས་ཚོགས་ལ་གསེར་གྱི་འགྱེད་དང་། མར་ཁལ་བརྒྱ་ཡི་དཀར་མེ་དང་། ཚོགས་འཁོར་སྐོར་བ།སོགས་རྒྱལ་བ་རྒྱ་མཚོར་མཆོད་པའི་ཕུང་པོ་ཀུན་བཟང་གི་མཛད་པ་དང་མཉམ་པར་མཛད། བསྟན་སྲུང་དམ་ཅན་རྒྱ་མཚོར་སྤྱན་གཟིགས་དཔག་མེད་ཕུལ་ཏེ་རྒྱལ་བའི་བསྟན་པ་སྲུང་བའི་བཀའ་བསྒོ་དམ་བཞག་གཉེར་ཏུ་གཏད།
ཕྱི་ལོ་༡༤༩༠་ལོར་དགུང་ལོ་རེ་གཅིག་པར་ཕེབས་སྐབས་གདན་ས་རིན་ཆེན་རྩེར་ཚུར་ཕེབས་ལམ་དུ་སྔོན་མོ་རྫོང་ཞེས་པའི་ས་གནས་སུ་དགོངས་པ་ཆོས་དབྱིངས་སུ་བསྡུས་སོ། སྐུ་གདུང་ཕལ་ཆེར་རིང་སྲེལ་དུ་གྱུར་བ་དང་། ཁྱད་པར་དུ་དབུ་ཐོད་བཟོ་བོ་མཁས་པས་ཐིག་བླངས་བ་ལྟར་ལིང་གིར་འཕར་བའི་ཚང་བུག་གཡས་གཡོན་དུ་ན་རོ་དང་། གཤིན་རྗེ་བཤད་ཀྱི་སྐུ་རང་བྱོན་ཕེབས་པ་ངོ་མཚར་བའི་རྟགས་མཚན་མང་དུ་བྱུང་བར་གྲགས། རྗེ་འདི་ཉིད་གདན་ས་མང་པོའི་ཁྲི་བ་མཛད་ཅིང་ཆོས་ཀྱི་འཁོར་ལོ་རྒྱ་ཆེན་པོ་བསྐོར་བའི་སྐུ་ཚེ་འདའ་བར་མཛད་ཅིང་། བར་སྐབས་སུ་ལྗགས་རྩོམ་མཛད་པའི་གསུང་རྩོམ་ནི་རྒྱ་ཆེ་ལ་གཏིང་ཟབ་པའི་གཞུང་པོད་བཅུ་གསུམ་ཙམ་བཞུགས་ཡོད། དེ་དག་རྣམ་གྲངས་བདུན་ཅུ་ལྷག་ཙམ་དང་། ལྡེབ་གྲངས་བཞི་སྟོང་ཆིག་བརྒྱ་ལྷག་ཙམ་གྱི་ནང་ཡིག་འབྲུ་བྱེ་བ་གཉིས་དང་བཞི་འབུམ་དྲུག་ཁྲི་ཙམ་ཡོད། ཁོང་གི་མཛད་རྣམ་མདོར་བསྡུས་ཞིག་ཡིན་དེ་ལས་རྒྱས་པ་གྲགས་ཆེ་བ་རྣམ་ཐར་བརྒྱད་ཡོད་དེ་ལ་གཟིགས་པར་ཞུ། རིན་ཆེན་དཔལ་དང་པདྨ་རྣམ་རྒྱལ་གཉིས་ཀྱིས་བྲིས་པའི་ཀུན་མཁྱེན་བསོད་ནམས་སེང་གེའི་མཛད་རྗེས་རགས་ཙམ་གླེང་བ་ཞེས་པ་ལས་ཉུང་བཏུས་བྱས་སོ
ཡོངས་ཁུངས་ཀུན་མཁྱེན་འདས་མཆོད་གླེང་སྟེགས་ལས་བླངས།