ཡབ་ཟངས་ཚ་བསོད་ནམས་རྒྱལ་མཚན་དང་ཡུམ་གཉིས་ཀྱི་སྲས་སུ་བོད་ཤིང་མོ་ལུགཕྱི་ལོ་༡༢༣༥ལོར་སྐུ་བལྟམས།བལྟམས་མ་ཐག་པ་ནས་འོད་གསལ་ལ་བྱང་ཆུབ་པའི་ཡོན་ཏན་རང་ཆས་སུ་མངའ་བས་ཀུན་གྱིས་མཚན་མཆོག་གསུམ་ལྡན་གྱི་གདུང་བརྒྱུད་རྣལ་མ་ཡིན་པའི་ངེས་པ་རྙེད།རྒྱ་བོད་སོགས་ཀྱི་ཡི་གེ་དང་རྩིས་སོགས་ཟབ་པ་དང་རྒྱ་ཆེ་བའི་ཆོས་ཀྱི་ཚུལ་དུ་མ་མ་བསླབས་པར་མཁྱེན་པས་དེ་ལྟར་ཆོས་རྗེ་ས་སྐྱ་པཎྜིཏ་ལ་ཞུས་པ་ན།ཆོས་རྗེའི་ཞལ་སྔ་ནས།ཡི་གེ་དང་སྐད་ལ་སོགས་པ་འདི་དག་འདི་ཙམ་ན་ཤེས་ཀྱིན་འདུག་འདི་ཙམ་ན་མི་ཤེས་བྱ་བ་ནི་མཐའ་རྟོགས་པར་དཀའ།འོན་ཀྱང་འདི་ལ་ནི་ཡོན་ཏན་འདིི་དག་དང་།འདིས་བས་ཆེས་རྨད་དུ་བྱང་བ་དུ་མ་མངའ་སྟེ་དེ་དག་ཐམས་ཅད་ལྷུན་གྱིས་གྲུབ་པའོ་ཞེས་གསུངས་སོ།སྐུའི་དགུང་ལོ་བཞི་པ་ནས་ས་སྐྱ་པཎྜིཏ་ཉིད་ལ་མངའ་བའི་དབང་དང་བྱིན་རླབས་ཀྱི་བཀའ་དུ་མ་དང་མན་ངག་དང་ཟབ་པ་དང་རྒྱ་ཆེ་བའི་ཆོས་ཀྱི་སྒོ་བསམ་གྱིས་མི་ཁྱབ་པ་བུམ་པ་གང་བྱོའི་ཚུལ་གྱིས་བཞེས།སྒོ་རུམ་གྱི་ཉི་ཟེར་ལ་ན་བཟའ་དང་འཁོར་གསུམ་བཀལ་བ་ལ་སོགས་པའི་སྐུ་ཡི་རྫུ་འཕྲུལ་བསྟན་པས་འཕགས་བོད་གྲུབ་པའི་དབང་ཕྱུག་མཐའ་དག་གི་ཁེངས་པའི་རྒྱུད་འགུགས་པར་མཛད།མཁྱེན་རབ་ཀྱི་དབང་ཕྱུག་འཇམ་མགོན་ས་སྐྱ་པཎྜིཏ་ལ་མཁན་པོ་ཞུས།དགེ་བའི་བཤེས་གཉེན་ཟུལ་ཕུ་བ་ལ་སློབ་དཔོན་ཞུས་ཏེ་རབ་ཏུ་བྱུང་ནས་བློ་གྲོས་རྒྱལ་མཚན་དཔལ་བཟང་པོ་ཞེས་པའི་མཚན་གྱིས་ཅོད་པཎ་བརྒྱན།དགུང་ལོ་བཅུ་བཞེས་པའི་ཤིང་ཕོ་འབྲུག་གི་ལོར་མཁྱེན་རབ་ཀྱི་དབང་ཕྱུག་ས་སྐྱ་པཎྜིཏས་ཁ་བ་ཅན་གྱི་དོན་འབའ་ཞིག་གི་སླད་དུ་ཐག་རིང་ཉི་མ་ཤར་ཕྱོགས་རྒྱལ་པོ་གོ་དན་གྱི་བསོད་ནམས་མགྲོན་དུ་ཕེབས་པའི་ཚེ་གཅུང་ཕྱག་ན་དགུང་ལོ་དྲུག་དང་ཟུང་དུ་འབྲེལ་ཏེ་ཆོས་རྗེ་ས་སྐྱ་པཎྜིཏའི་ཕྱག་ཕྱིར་བྱོན།སློབ་མའི་ཚོགས་དང་སྐྱེ་རྒུ་ཕལ་མོ་ཆེ་ནི་ཐེག་པ་གསུམ་གྱི་ཆོས་ཀྱི་དགའ་སྟོན་གྱིས་ཡང་དག་པར་མགུ་བར་བྱས་པས་ཆོས་རྗེ་དགོངས་པ་གཞན་དོན་དུ་ཕེབས་ཟིན་པའི་རྗེས་རིམ་གྱིས་སའི་བདག་པོ་ཇི་གྱིམ་གན་ནས་རྒྱལ་རབས་ལྔ་པ་མིའི་དབང་པོ་གོ་པེ་ལའི་ཕོ་བྲང་དུ་བྱོན་ཏེ་རྒྱལ་སྲས་བཙུན་མོ་བློན་འབངས་དང་བཅས་པས་སྤྱི་བོས་ཞབས་ཀྱི་པད་མོར་གཏུགས་ཤིང་ཤིན་ཏུ་ཟབ་པ་དང་རྒྱ་ཆེ་བའི་ཆོས་ཀྱི་སྒོ་དུ་མ་ཞུས་ཏེ་བདག་ཉིད་ཆེན་པོ་འདི་ལ་མི་ཕྱད་པའི་དད་པ་ཐོབ།རྒྱལ་པོས་བསྐུལ་བ་བཞིན་ཧོར་ཡིག་འཁོར་མ་གྲུ་བཞི་མ་གསར་དུ་བསྐྲུན།རྒྱལ་པོས་རྡོ་རྗེ་ཐེག་པའི་རྒྱུད་ཀྱི་རྒྱལ་པོ་དགྱེས་པ་རྡོ་རྗེའི་ཆོས་ཀྱི་བདུད་རྩིའི་དགའ་སྟོན་ལན་གསུམ་བཞེས་པའི་དང་པོའི་དུས་སུ་བོད་ཀྱི་ཁྲི་སྐོར་བཅུ་གསུམ་ལ་སོགས་པ་དང་།གཉིས་པའི་དུས་སུ་བོད་ཆོལ་ཁ་གསུམ་ལ་སོགས་པ་དང་།གསུམ་པའི་དུས་སུ་རྒྱའི་མི་ཡུར་ཆེན་མོ་དང་མ་སྐྱེས་དགྲའི་གདུང་བསྐལ་གྱི་བདེ་བར་གཤེགས་པའི་འཕེལ་གདུང་ལ་སོགས་པ་རྣམས་ཆོས་སྤྲིན་དུ་ཕུལ་ལོ།དེས་ན་རྒྱའི་མི་ཡུར་ཆེན་མོ་བཅད་པའི་བདག་རྐྱེན་ལས་མི་ཁྲི་འབུམ་མང་པོར་མི་འཇིགས་པ་སྐྱབས་ཀྱི་སྦྱིན་པ་བླ་ན་མེད་པར་བསྩལ་བའི་རྣམ་ཐར་འདིས་རྒྱ་དཀར་ནག་བོད་དང་བཅས་པའི་སྐྱེ་རྒུ་མཐའ་དག་གི་རྒྱུད་འགུགས་པར་བྱས་པའི་རྒྱུ་རྐྱེན་ལས་འགྲོ་བའི་མགོན་པོ་ཆོས་ཀྱི་རྒྱལ་པོ་འཕགས་པ་རིན་པོ་ཆེ་ཞེས་བྱ་བའི་སྙན་པའི་གྲགས་པས་སྟེང་གི་ཕྱོགས་ཀུན་ཁྱབ།ནམ་ཞིག་གི་ཚེ་རྒྱལ་པོའི་གསུང་གིས།བོད་འབངས་ཐམས་ཅད་ས་སྐྱ་པའི་ཆོས་ལུགས་ལས་གཞན་བྱེད་དབང་མེད་པའི་ལུང་འབུད་གསུངས་པ་ལ་རང་རང་གི་ཆོས་ལུགས་གང་ཡོད་སྐྱོང་དུ་འཇུག་པ་ཅིས་ཀྱང་དགོས་ཞེས་གསུངས་པའི་བཀའ་དྲིན་ལས་དེང་བར་བཀའ་རྙིང་ལ་སོགས་ཆོས་བརྒྱུད་སྣ་ཚོགས་འགྲོ་བའི་དཔལ་མགོན་དོན་དུ་བཞུགས་པ་ནི་འཕགས་པ་རིན་པོ་ཆེའི་སྐུ་དྲིན་ཁོ་ན་རུ་འཁུམས་སོ།མགོན་པོ་དེ་ཉིད་ཀྱིས་གདན་ས་ཐེངས་གཉིས་མཛད་པའི་དང་པོ་ནི།ཤིང་མོ་གླང་།ཕྱི་ལོ་༡༢༦༥ནས་མེ་ཕོ་སྟགཕྱི་ལོ་༡༢༦༦བར་དང་།གཉིས་པ་མེ་ཕོ་བྱི་བ།ཕྱི་ལོ་༡༢༧༦ནས།ལྕགས་ཕོ་འབྲུགཕྱི་ལོ་༡༢༨༠བར་དུ་མཛད།མདོར་ན་དགུང་ལོ་གསུམ་བཞེས་པའི་ཚེ་ཀྱེ་རྡོ་རྗེའི་སྒྲུབ་ཐབས་ཆེན་པོ་གྲུབ་ཆེན་མཚོ་སྐྱེས་ཀྱིས་མཛད་པ་ལ་སོགས་དང་།གསང་སྔགས་ཀྱི་ཆོས་སྐོར་དུ་མ་གསུངས་པའི་དུས་དེ་ནས་བཟུང་།རྒྱ་དང་།ཧོར།འཇང་།ཡུ་གུར།མི་ཉག་ལ་སོགས་སྐལ་ལྡན་སྣོད་དུ་རུང་བའི་འགྲོ་བ་མ་ལུས་པ་ཐེག་པ་ཆེན་པོར་བཀོད་ཅིང་བདེ་བ་གཤེགས་པའི་བསྟན་པ་རིན་པོ་ཆེ་ཉིན་བྱེད་ཀྱི་སྣང་བ་ལྟར་ཆེས་ཆེར་གསལ་བར་མཛད་དེ་མཐར་དགུང་གྲངས་ཞེ་དྲུག་བཞེས་པ།ཕྱི་ལོ་༡༢༨༠ལྕགས་ཕོ་འབྲུག་ལོར་སྐུ་གཤེགས་པའི་ཚུལ་བསྟན་ཏོ།